Home » Archives » 23. March 2006
May piring ang Katarungan.. Ang katotohanan at ang di-maalis-alis sa bayan..
March 23, 2006 Hustisya para sa lahat!
Alas kuwatro y medya.. isang mensahe ang aking natanggap na nagpamulat sakin sa isang katotohanan.. na magiging hudyat sa lumalalang kabagalan sa pagkamit ng katarungan.
Sa mga nagbabasa ng blog na ‘to simula’t sapul. Minsan kong naibahagi ang buhay ni Benjaline Hernandez o mas kilala sa tawag na Beng, isa sa mga biktima ng krimen noong ika-5 ng Abril, 2002 sa Sitio Bukatol, Brgy. Kinayawan, Arakan Valley. Si Megace, kababatang kapatid ni Beng ay napadaan sa blog ko at nabasa ang entry na yun. At sa kanyang mensaheng ibinahagi sa’kin, lubos niyang ikinukundena ang mabagal na proseso ng hustisya sa pagkamatay ng kanyang ate. Ayon kay Megace, may tatlong hearings sa isang taon at sa bawat hearing, iilan ang naiipresent na testigo. Dinagdag pa niya ang kalungkutang kahit murder ang kaso ay nakabail pa rin ang mga pumatay. Bakas sa mensahe niya ang pangungulila sa ateng naging sandigan niya sa lahat ng bagay sa loob ng labimpitong taon. At ang pagkamatay nito ay isang malaking kawalan sa buhay niya at ng kanyang pamilya.
Si Megace ay may simpleng pangarap. Hangad lamang niyang mabigyan ng hustisya ang pagkamatay ng isang taong malapit at mahalaga sa kanya. Di natin maitatangging maraming tao rin ang pinagkaitan ng hustisya. Sila na umaasa sa hatol ng korte. Ngunit paano makakamit ang sinasabing hustisya kung kayod-pagong naman ang nangyayari. Isang napakasakit na katotohanang halos hindi katanggap-tanggap.
Isang napakasakit na sampal ang katotohanang sa bawat galaw ng bawat tao ay nasa kamay lamang ng iilan na tumatakda sa kapalaran ng mga taong salat sa kapangyarihan. Na sa bawat paghihirap ay mapupunta lamang sa wala. Saan ngayon ang hustisya?
Ano nga ba ang meron sa hustisya sa bansa? Kung wala na nga bang paraan na misaayos ang gusot, mabuti na nga lang bang kalimutan ang masakit na nakaraan? O kaya’y idaan na lamang sa marahas na pakikipaglaban? O ipasa-Diyos na lang ang lahat?
